Click here to read in English.

E aro atu ana te mahi rangahau o te kōpaki pūtaiao o Scion, e kīia nei ko te Restoration Protection and Mauri o Te Waonui a Tāne, ki te urupare me te whakarite mō ngā tūraru hauropi kua whakarākeihia e te āhuarangi hurihuri, i ō tātou ngahere e tū ana, tae ana ki ngā ngārara, ngā tukumate, ngā ahi, me ngā rangahau ā-papori, ngā rangahau a te Māori mō te houkura tuku iho me te toitūtanga o ngā ngahere mō Aotearoa nei.

Ko ‘E heke e Heka!’ tētahi kaupapa i whakahaerehia e te Māori e toha atu ana i ngā kōrero pūtaiao ā-taiao mō te heka kahika, ā, e hiahia ana ki te whakanui ake i te tomopaitanga me te mōhiotanga e mōhio ai ngā rangatahi me ngā hapori ki tētahi take e pā kino atu ana ki ngā momo taonga o te whānau kahika.

Kaupapa

He mate puruheka te heka kahika e pā atu ana ki ngā momo taketake me ngā momo rāwaho o te whānau kahika, ā, he nui te whakawehi o tēnei mate ki te rerenga rauropi o ngā ngahere ki Aotearoa nei.

Mai i te wā i kitea tēnei mate ki Aotearoa, kua rangahau, kua aroturuki hoki ngā kaipūtaiao me ngā hunga tiaki i tēnei mate. Engari, i mua noa i tēnei wā tonu nei, he itiiti noa ngā rauemi tomopai mō te heka kahika kua whakaritea mā ngā rangatahi me te hapori, inarā he itiiti ngā rauemi reo Māori.

Ko te tahua pūtea e kīia nei ko Unlocking Curious Funds, he tahua i tautoko i a Scion ki te whakawhanake i tētahi rauemi ako, tētahi rauemi pāhekoheko e hou ana, e kīia nei ko ‘E heke e Heka!’, ā, i waihangatia tēnei taupānga hei whakapakari i ngā rangatahi mā te whakaako i te heka kahika. Ko te aronga nui o tēnei taupānga ko te tomopai me te pāhekoheko, nā runga i tērā, ka whakatōpūtia e tēnei taupānga ngā kōrero pūtaiao o naianei me ngā kōrero auaha, ngā kōrero e hāngai ana ki te ahurea Māori, ā, ka whakatairanga hoki i te reo Māori me ngā kōwhiringa reo rua mā ngā tāngata kanorau, kua 12 tau te pakeke, nui ake rānei.

Tāpiri atu ki tēnei taupānga ko ‘Mātaihia Te Heka!’, he hangarau ao niko e whakaorangia ai ngā peka rākau, e wātea hoki ai te kaiwhakamahi ki te hōpara, ki te rapu, ki te tautohu hoki i te heka kahika ki runga i ētahi momo kahika

Te Reo Māori

Kāore anō te heka kahika, arā te ‘myrtle rust’ kia whai i tētahi ingoa Māori ōkawa, i tētahi whakamāoritanga ōkawa rānei. Kua whakamahia he kupu mino i ētahi horopaki, tērā ranei kua whakamahia te ingoa Pākehā, ahakoa he Māori tonu te horopaki. Ka whakatairanga tēnei taupānga i te whakamahinga o te reo Māori me ngā kōwhiringa reo rua, nā reira i tika ai tā te rōpū mahi hōpara i ngā tukanga mō te whakamārama me te kōrero mō te heka kahika i te reo Māori huri noa i tēnei taupānga ako. Kia oti pai ai tēnei mahi, i wānanga te rōpū mahi ki te taha o ētahi mātanga pūtaiao, ētahi tohunga o te mātauranga Māori, ētahi mātanga reo Māori anō hoki, i reira rātou arotake ai i ngā āhuatanga o ngā momo kahika, te pānga o te puruheka, me te whakapapa ā-reo o tēnei tipu huri noa i te Moananui-a-Kiwa.

Kahika – e hono atu ana i ngā pakiaka reo protoOceanic, me ngā pakiaka reo proto-Polynesian ki ngā whānau kahika (Myrtaceae).

Heka – mō te horopaki o te heka kahika (myrtle rust) ka whakamahia tēnei hei tūingoa, hei tūmahi, hei tūāhua anō hoki, h.t. fungi, fungal rust, infection.

Whānau Kahika – ka whakamahia hei whakamārama mō te ‘Myrtaceae’ i tēnei taupānga.

Heka Kahika – ka whakamahia hei whakamārama mō te ‘myrtle rust’ i tēnei taupānga.

E heke, e Heka! Ko te ingoa o te taupānga e whakatinana ana, e tohu ana hoki i tā mātou whāinga nui ki te whakamimiti i te heka kahika.

Mātaihia Te Heka! He taupānga, he kēmu ao niko tēnei ka whakamahia hei mātai i te heka kahika.

I tā tētahi tauira whakamahi i te ngohe ao niko, i mea atu ia, “ānō nei kei roto au i te ngahere”. I kī ētahi atu, he whakangahau, he whakahirahira te taupānga, waihoki, he nui ngā akoranga o roto.

Kei roto i te ngahere whakaako ā-matihiko mō te heka kahika, ka haere te kaiwhakamahi i ētahi tūāoma, ka ako i ētahi āhuatanga pūtaiao e hāngai ana ki te whānau Myrtaceae – arā ko ngā tipu kahika, te pūtaketanga o te heka kahika, te pokenga, te mahi tautuhi, ngā āhuatanga taiao, me te tirohanga ki te anamata.

Ka whakaruku te taupānga i te kaiwhakamahi ki roto i tētahi puna pūtaiao ā-taiao, ā, he kai mānga te kai o roto, ka whakaurua hoki ētahi pikitia matihiko, ētahi whakaahua pukutoro, ētahi āhuatanga pāhekoheko, ētahi kēmu, me ngā ngohe ao niko e honoa ai te kaiwhakamahi ki ngā kōrero e whakaaturia ana.

Ka whakaarohia, ka whakamahia hoki te ao Māori mā te aro atu ki te mātauranga ā-rohe o te kaiwhakamahi mēnā e whaitake ana ki tōna ake taiao.

Akoako – Te Pahekoheko

I tae atu ētahi rangatahi Māori e matatau ana ki te kōrero Māori, ā, he 10 ki te 18 tau te pakeke, ki te whare o Scion ki te tūhura, ki te whakamātau hoki i tētahi tauira whakamātau o te taupānga nei, i hoatu hoki rātou i ētahi whakahoki kōrero. I kohia tētahi mōhiotanga paepito ki te heka kahika i te tīmatanga, i te whakamutunga hoki, kia kitea ai te whaihua o tēnei taupānga hei rauemi ako, hei rauemi pāhekoheko. I tomo atu ngā rangatahi katoa me te kore o rātou i paku mōhio ki te heka kahika, ki ngā momo kahika taketake rānei, ā, tae rawa ki te whakamutunga o te wānanga, i piki ake te whaiwhakaarotanga o ngā rangatahi katoa ki te heka kahika, ka mutu i taea e rātou te āta whakamārama ētahi āhuatanga i akona e rātou.

I homai hoki e rātou he whakahoki kōrero kua whakaurua ki roto i te momo whakamutunga o tēnei taupānga.

Ngā Kaiako Reo Māori: I hoatu hoki ētahi kaiako reo Māori i ētahi kōrero āwhina, i ētahi whakahoki kōrero i te wā e whakawhanakehia ana tēnei taupānga. I āwhina aua kōrero ki te whakatōpū, ki te tūhono i ngā kōrero o roto ki ngā ngohe, i āwhina hoki i te whakaako tika o te mātauranga pūtaiao, inarā mō ngā rangatahi te take.

Ka taea te whakamahi tēnei taupānga hei rauemi ako tautauāmoa, hei rauemi rānei mō tētahi akoranga pērā i te kura, i ngā kaupapa whakangungu rānei.

Ngā kupu aumihi

Ministry of Business, Innovation & Employment (MBIE) Unlocking Curious Minds Fund. Ngā Kura tautoko, Kiwa Digital, Conical Studios, Te Haeata Consultancy Ltd. (Ruakiri & Uenuku Fairhall), Jacob McGregor, Rangatahi focus group, Te Whaeoranga Smallman, Dr. Stuart Fraser, Te Rātā Whakamaru, Kanapu Rangitauira, Hana Aranga, Sera Raroa, Lisa Berndt, Roanne Sutherland, Jasmine Hessell, Maria Zhulanov, Kim Murrell, Claire Stewart, Grant Evans, iNaturalist NZ & New Zealand Plant Conservation Network.

Te Kāhui Rangahau ki Scion:

Katerina Pihera-Ridge

Dr. Michael Bartlett

Piata Raroa

Taiāwhio Bryers

Sierra De La Croix

Contact: ngahere@scionresearch.com

Download the apps here!

• E heke e Heka! (Apple App Store)
• E heke e Heka! (Google Play)
• Mātaihia te heka (Apple App Store)